कमला केसी/दक्षिण कोरिया
नेपाली विद्यार्थी समाज, दक्षिण कोरिया (सोनसिक) ले बिसौँ स्थापना दिवसको अवसरमा आयोजना गरेको “सोनसिक अन्तर्राष्ट्रिय शैक्षिक सम्मेलन-२०२४“ सम्पन्न भएको छ ।
सहकार्यात्मक नेतृत्वः दिगो विकासका लागि अन्तरविषयगत नवप्रवर्धन र वैज्ञानिक उत्कृष्टताको उत्प्रेरक’’ भन्ने विषयवस्तुलाई मुख्य आधार मानेर आयोजना गरिएको अन्तर्राष्ट्रिय शैक्षिक सम्मेलन गत जुन १५ र १६ गते दक्षिण कोरियाको छनानमा अवस्थित नामसउल विश्वविद्यालयमा सम्पन्न भएको हो ।
नेपाल सरकारका शिक्षा, विज्ञान तथा प्रविधि मन्त्री सुमना श्रेष्ठको प्रमुख अतिथ्यतामा सम्पन्न भएको थियो । कार्र्यक्रमलाई सम्वोधन गर्दै मन्त्री श्रेष्ठले कोरिया लगायत विश्वभर छरिएर रहेका सम्पूणर् नेपाली वैज्ञानिक तथा शिक्षाविद्हरुलाई एक हुन यस सम्मेलनले ठूलो भूमिका खेलेको र यस्ता प्रकारका सम्मेलनहरु नेपालमै गर्नको लागि प्रस्तावना लिएर आउन अनुरोध गर्नुभयो । विश्वभर छरिएर रहेका नेपाली वैज्ञानिक तथा शिक्षा विद्हरुलाई राष्ट्रप्रति थप जिम्मेवार बन्दै शिक्षाको आधुनिकीकरणमा वैदेशिक शैक्षिक संस्था तथा नीतिगत तहबाट समन्वयन र सहकार्य गरी आफूलाई सहयोग गर्न पनि मन्त्री श्रेष्ठले आग्रह गर्नुभयो । शिक्षा र अनुसन्धानले मात्रै समाजलाई सभ्य बनाउन र मानव जीवनको औचित्यलाई अझै परिष्कृत गर्न सक्ने भन्दै यस्तो कार्यक्रम मार्फत सबैलाई जोड्न प्रायस गरेकोमा आयोजकलाई आभार प्रकट गर्नुभएको थियो ।
कार्यक्रममा नामसउल विश्वविद्यालयका प्रेसिडेन्ट प्रा. डा. स्युङ योङ युन्, कोरियाका लागि मिशन उप प्रमुख पुष्पराज भट्टराई, निड टिम लिडर किम ना युन को विशिष्ट अतिथ्यता, बिभिन्न क्षेत्रका बिज्ञ, बैज्ञानीक, तथा शिक्षा र अनुसन्धान क्षेत्रका विशिष्ट व्यक्तिहरू लगायत दुई सय भन्दा बढी राष्ट्रिय तथा अन्तरराष्ट्रिय स्तरका अनुसन्धान कर्ता, बिशेषज्ञ र विद्यार्थीहरुको सहभागिता रहेको थियो ।
उद्घाटन सत्रमा प्रेसिडेन्ट प्रा. डा. स्युङ योङ युन्, सहायक प्रमुख पुष्पराज भट्टराई, वैज्ञानिक समितिका अध्यक्ष देवी बहादुर बस्नेतले विशेष सम्बोधन गर्नुभएको थियो । उद्घाटन सत्रमा कोरियाका लागि नेपाली राजदुत महामहिम ज्योति प्याकुरेल भन्डारी आउने तय भए पनि अकस्मात स्वास्थ्य समस्याका कारण आउन नसके पछि उहाँको सन्देश सोनसिकका अध्यक्ष मेघनाथ पौडेलले पढेर सुनाउनु भएको थियो ।
कार्यक्रममा आयोजक समितिका संयोजक किरण सुवालले स्वागत तथा समाजका अध्यक्ष मेघनाथ पौडेलले धन्यवाद मन्तव्य राख्नु भएको थियो । कार्यक्रमको सहजीकरण संस्थाका सचिव नारायण सराफ, सोनसिक मिडिया उप समिति संयोजक डा. कमला केसी, र नामसउल विश्वविद्यालयमा अध्ययनरत विद्यार्थी कान्ति खतिवडाले संयुक्त रुपमा गर्नुभएको थियो ।
दुई दिने सम्मेलनको उद्दघाटन जुन १५ तारिख बिहान नामसउल विश्वविद्यालयका प्रेसिडेन्ट प्रा. डा. स्युङ योङ युन्, कोरियाका लागि मिशन उप प्रमुख पुष्पराज भट्टराई र समाजका अध्यक्ष मेघनाथ पौडेलले संयुक्त रूपमा गर्नुभएको थियो । सम्मेलनको विशेष वक्ताको रूपमा नेपालबाट आउनुभएका नेपाली बैज्ञानिक प्रा. डा. निरन्जन पराजुली र प्रा. डा. लुइस केनेरे रहनुभएको थियो । त्यस्तै चर्चित टेलिभिजनकर्मी सुजन शाक्यले विशेष वक्ताको रुपमा प्रस्तुति दिनुभएको थियो ।
उद्घाटन सत्रमै सोनसिकले नेपाली बिद्यार्थीको हक हितका लागि भनेर पहिलो पटक सोनसिकको आफ्नै एप ल्याएको छ । उक्त सुपर सोनसिक एपको उद्घाटन नेपाली राजदुताबासका उपनियोग प्रमुख पुष्पराज भट्टराईले गर्नुभएको थियो ।
“सम्मेलनको पहिलो दिनमा Mind Matters भन्ने विषयमा प्राध्यापकहरू डा. सिर्जना थापा र डा. युन् सिल किमले गहन अन्तरक्रिया गर्नुका साथै कोरियामा अध्ययनरत स्वदेशी तथा विदेशी विद्यार्थीहरुलाई विशेष परामर्श प्रदान गर्नुभएको थियो । सो अवसरमा कोरियामा रहेका आप्रवासी बालबालिका लक्षित ‘ट्यालेन्ट शो’ हाजिरी जवाफ, चित्रकला, र आफ्नो क्षमता देखाउने प्रतियोगितात्मक कार्यक्रम गरिएको थियो ।
सम्मेलनलाई प्रभावकारी तवरले सञ्चालन गर्नको लागि शिक्षा, समाजशास्त्र, नेचुरल साइन्स, मेडिसिन, फार्मेसी, माइक्रोबायोलोजी, कंप्यूटर विज्ञान, इन्जिनियरिङ, वैकल्पिक ऊर्जा, मनोविज्ञान लगायत सम्पूणर् विषयवस्तुलाई समेटी चार ओटा छुट्टाछुट्टै सत्रहरू दुई घण्टा सम्म एकै समयमा सञ्चालन गरिएको थियो ।
पोष्टर प्रस्तुति एक घण्टा चलेको थियो । प्रथम सत्र नेचुरल साइन्स तथा मेडिसिनको नेतृत्व प्राकृतिक तथा वैकल्पिक ऊर्जा विज्ञ डा. अग्नि राज कोइरालाले गर्नुभएको थियो भने डा. पुन माया महर्जनले CRISPER Cas gene editing सम्बन्धी अनुसन्धानात्मक तथ्यहरूको विशेष प्रस्तुती दिनुभएको थियो ।
प्राध्यापक डा. ज्ञानेन्द्र प्रसाद जोशीले नेतृत्व गर्नुभएको आई. टि, इन्जिनियरिङ तथा कम्प्यूटर साइन्स लगायतका बिषयबस्तुलाई समेटिएको दोस्रो सत्रमा पनि आधा दर्जन भन्दा धेरै वैज्ञानिक तथा अनुसन्धानकर्ताले आफ्ना अनुसन्धानहरुलाई प्रष्ट्याउनु भएको थियो । सोसल साइन्स एण्ड म्यानेजमेन्टको सत्रमा प्रोफेसरहरु डा. हान् व्योल यो र डा. हान युन् जुङ विशेष प्रस्तुतकर्ताको रूपमा आमन्त्रित हुनुहुन्थ्यो भने पाँचजना अनुसन्धानकर्ताले आफ्ना सोधपत्रहरूको नतिजालाई स्पष्ट पार्नुभएको थियो । तेस्रो सत्रको नेतृत्व प्राध्यापक डा. मधुसुधन आत्रेयले कुशलतापूर्वक गर्नुभएको हो । त्यस्तै गरी प्राध्यापकहरू डा. सिर्जना थापा र डा. युन् सिल किमको नेतृत्वमा सम्पन्न मेन्टल हेल्थ एंड वेलविङ सम्बन्धित सत्रमा पनि विशेष आमन्त्रित वक्ताको रुपमा प्राध्यापक डा. ए जङ पार्क र डा. सरन हरि श्रेष्ठले विशेष सम्बोधन गर्नुभयो भने अन्य अनुसन्धानकर्ता तथा विद्यार्थी गरी सातओटा विशेष प्रस्तुतिहरु सम्पन्न भएका थिए । डा. सौगात सिवाकोटी, डा. कपिल गुरुङ तथा डा. उस्मान मुहम्मदले सत्रहरुको सहजीकरणमा प्रभावकारी भूमिका निर्वाह गर्नुभएको थियो ।
पोष्टर प्रस्तुति सत्रमा पनि दर्जनौँ अनुसन्धानकर्ताहरुको उल्लेख्य सहभागिता रहेको थियो । कोरिया र अन्य विभिन्न देशलाई प्रतिनिधित्व गर्दै सहभागी अनुसन्धानकर्ताहरुले गर्ने अनुसन्धानहरु अत्यन्तै स्तरीय र समाजलाई ठूलो योगदान दिन सक्ने खालको रहेको पोष्टर मूल्यांकन विज्ञ टिमका संयोजक डा. घनश्याम ज्ञवालीले बतउनुभयो ।
सन् २००४ मा स्थापना भएको सोनसिकले यस बर्ष बिभिन्न कार्यक्रमहरु गर्दै आफ्नो स्थापनाको २० औं बर्ष मनाईरहेको छ । बिश्वभरका आफना आलमुनाई मार्फत नेटवर्क बिस्तार गरिरहेको सोनसिकले शैक्षिक, सांस्कृतिक कार्यक्रमहरु गर्दै आईरहेको छ । यस बर्ष नामसउल विश्वविद्यालयको तीसौं वार्षिक उत्सवको अवसर पारेर उक्त सम्मेलन सोनसिक र विश्वविद्यालयको सहकार्यमा सम्पन्न भएको हो । सम्मेलनलाई नेपाली राजदुतावासले मुख्य प्रायोजन गरेको थियो भने एक्सपर्ट एजुकेशन एण्ड भिसा सर्भिस, जिमोनी ट्रान्स, लर्न कोरियन विथ विवेक, सिद्धार्थ फुटबल क्लब-थेगू तथा रोयल इन्डियन रेष्टुरेन्टले प्रायोजन गरका थिए ।
