नेपालमा फेसबुकले कन्टेन्ट मोनिटाइजेसन सुविधा औपचारिक रूपमा उपलब्ध गराएसँगै डिजिटल प्लेटफर्ममार्फत आम्दानी गर्ने नेपाली प्रयोगकर्ताको संख्या उल्लेखनीय रूपमा बढ्दै गएको छ। विशेषगरी भिडियो, रील, फोटो तथा लेखन सामग्रीमार्फत आम्दानी गर्ने ट्रेन्ड तीव्र बन्दै गएको छ। यसै सन्दर्भमा कन्टेन्ट सिर्जनाकर्ताबीच सहकार्य, अनुभव आदान–प्रदान र आपसी सहयोगको आवश्यकता पनि झनै महसुस हुन थालेको छ।
यही आवश्यकता पूरा गर्ने उद्देश्यले स्थापना गरिएको ‘Facebook Monetize सहकार्य’ नामक फेसबुक ग्रुप अहिले नेपालकै सबैभन्दा ठूलो र अत्यन्त सक्रिय मोनिटाइजेसन–केन्द्रित समुदायका रूपमा स्थापित भएको छ। हाल यस ग्रुपमा एक लाख १५ हजारभन्दा बढी सदस्य आबद्ध छन्, जसले यसलाई डिजिटल सहकार्यको एक शक्तिशाली प्लेटफर्म बनाएको छ।
ग्रुपमार्फत सदस्यहरूले फेसबुक मोनिटाइजेसनका नियम, नयाँ अपडेट, कन्टेन्ट आइडिया, इङ्गेजमेन्ट बढाउने तरिका, समस्या र समाधानलगायतका विषयमा खुलेर छलफल गर्दै आएका छन्। धेरै सदस्यहरूले यही ग्रुपको सहकार्य र मार्गदर्शनबाट सफलतापूर्वक फेसबुक मोनिटाइजेसन अन गरेको र नियमित आम्दानी गर्न थालेको दाबी पनि गरेका छन्।
यस ग्रुपका परिकल्पनाकार तथा प्रमुख एडमिन दामोदर न्यौपाने हुन्। उनी स्वयं निरन्तर सक्रिय रहँदै सदस्यलाई प्रोत्साहन, मार्गदर्शन र सकारात्मक ऊर्जा प्रदान गर्दै आएका छन्। त्यस्तै, अर्का एडमिन प्रदीप गौतम पनि ग्रुप व्यवस्थापन, सहकार्य विस्तार र सदस्यको मनोबल बढाउन निरन्तर सक्रिय छन्।
ग्रुपको उद्देश्यबारे बोल्दै दामोदर न्यौपाने भन्छन्,
“यो ग्रुप केवल समय बिताउन फेसबुक चलाउनेहरूका लागि होइन, डिजिटल प्लेटफर्मलाई व्यवस्थित रूपमा प्रयोग गरेर आम्दानी गर्न चाहने सबैका लागि बनाइएको हो। हरेक कन्टेन्ट सिर्जनाकर्तालाई सहयोग पुर्याउनु नै हाम्रो मुख्य लक्ष्य हो।”
उनका अनुसार, डिजिटल प्लेटफर्ममा सफलता रातारात नआउन सक्छ।
“छोटो समयमा नतिजा नआए पनि धैर्य, निरन्तर अभ्यास र सकारात्मक सोच अत्यन्त आवश्यक छ। आजको सानो प्रयासले भोलि ठूलो अवसर र स्थायी आम्दानीको बाटो खोल्न सक्छ,” न्यौपानेले बताए।
एडमिन प्रदीप गौतम पनि सहकार्यलाई सफलताको मुख्य आधार मान्छन्।
“एक–अर्कालाई सहयोग गर्दा मात्र हामी बलियो बन्छौँ। पोस्टमा प्रतिक्रिया दिने, लाइक, कमेन्ट र सेयरमार्फत इङ्गेजमेन्ट बढाउने संस्कृतिले मोनिटाइजेसनको सम्भावना झनै बढ्छ,” उनले भने।
उनले नेपाली उखान स्मरण गराउँदै थपे,
“भनाइ छ— एक थुकी सुकी, सयौँ थुकी नदी। एक्लै लागेर फेसबुक मोनिटाइजेसनबाट आम्दानी गर्न गाह्रो हुन सक्छ, तर एक लाखभन्दा बढी सदस्य मिलेर सहकार्य गर्दा कुनै पनि लक्ष्य असम्भव हुँदैन। हाम्रो उद्देश्य सबै सदस्यलाई सक्षम, आत्मनिर्भर र सकारात्मक बनाउनु हो।”
डिजिटल प्रविधिको तीव्र विकाससँगै सामाजिक सञ्जाल अब केवल मनोरञ्जनको माध्यम मात्र नभई रोजगारी र आयआर्जनको भरपर्दो प्लेटफर्म बन्दै गएको छ। सहकार्य, धैर्य, निरन्तरता र सकारात्मक सोचका साथ अघि बढेमा फेसबुक मोनिटाइजेसन नेपाली कन्टेन्ट सिर्जनाकर्ताका लागि दीर्घकालीन र दिगो आम्दानीको महत्वपूर्ण माध्यम बन्न सक्ने देखिन्छ।
