स्याङ्जा– स्याङ्जाको वालिङ नगरपालिका वडा नम्बर १२ स्थित धनमुडामा नवनिर्मित शिव मन्दिरको समुद्घाटन एवं महाशिवरात्रि महोत्सव आयोजना गरिएको छ ।
हिन्दू धर्मावलम्बीहरूको महान पर्व महाशिवरात्रिको अवसर पारेर विविध धार्मिक कार्यक्रमसहित मन्दिर उद्घाटन गर्न लागिएको हो ।
फागुन १४ गते महाशिवरात्रिको दिन बिहान ८ बजे धनमुडा शिव मन्दिर परिसरबाट मूर्तिसहितको कलश यात्रा निकालिने छ । उक्त यात्राले साविक सिर्सेकोट गाबिसका वडा नम्बर ८, ९ को परिक्रमा गर्ने आयोजकले जनाएको छ ।
कार्यक्रममा मूर्तिहरूको प्राण प्रतिष्ठा, शिव पूजा, लक्षवर्ती दीप प्रज्वलन, प्रसाद ग्रहण लगायतका धार्मिक गतिविधिहरू गरिने भएको छ ।
सोहि दिन साँझ साँझ ६ बजेबाट राति १२ बजेसम्म भजन मण्डलीद्वारा भजन कीर्तनको विशेष कार्यक्रम समेत रहेको छ । उक्त धार्मिक समारोहमा सहभागी भई पुण्य कमाउनुका साथै कार्यक्रमलाई भव्य रुपमा सम्पन्न गर्नका लागि आयोजकले सबै श्रद्धालु भक्तजनहरूलाई हार्दिक निमन्त्रणा गरेको छ।
