सउल, दक्षिण कोरिया — गैर आवासीय नेपाली संघ (एनआरएनए) दक्षिण कोरियाको दशौं अधिवेशन तथा निर्वाचन यही आउँदो जुलाई २६ र २७ मा सम्पन्न हुने तयारीमा छ। अधिवेशनलाई विधिसम्मत, पारदर्शी र सुदृढ बनाउँदै संस्थागत संरचनामा आवश्यक सुधार ल्याउने उद्देश्यले संघले बिधान संशोधन समिति गठन गरेको छ।
समितिको संयोजकमा डा. एकराज बराल चयन भएका छन्। सदस्यहरूमा डा. किशोर कोइराला र पूर्णाराम (पुष्कर) बुढाथोकी रहेका छन्। समितिले वर्तमान बिधानको अध्ययन, विश्लेषण र आवश्यक संशोधनसहितको सुझाव अधिवेशनमा पेश गर्नेछ।
यसअघि निर्वाचन प्रक्रियालाई निष्पक्ष र व्यवस्थित बनाउने उद्देश्यले संघले निर्वाचन मण्डल पनि गठन गरिसकेको छ। निर्वाचन मण्डलको संयोजकमा वर्तमान सल्लाहकार तथा पूर्व आईसीसी सदस्य लोचन राई छन् भने सदस्यमा सञ्चारकर्मी डा. कमला केसी र प्रोफेसर डा. बाबु काजी श्रेष्ठ रहेका छन्। मण्डलले निर्वाचन प्रक्रियालाई मर्यादित, सहभागितामूलक र प्रभावकारी बनाउनेतर्फ तयारी तीव्र बनाएको छ।
संघको यो अधिवेशनले एनआरएनए दक्षिण कोरियालाई नयाँ ऊर्जा, सक्षम नेतृत्व र थप सुदृढ संरचना दिने विश्वास गरिएको छ। साथै, प्रवासी नेपाली समुदायको सहभागिता र प्रतिनिधित्वमा पनि थप मजबुती आउने अपेक्षा गरिएको छ।
