मुम्बई, जुन २८ – ‘कांटा लगा’ गीतबाट चर्चामा आएकी भारतीय मोडल तथा टेलिभिजन रियलिटी शो ‘बिगबोस १३’ की सहभागी शेफाली जरीवालाको हृदयघातका कारण निधन भएको छ। ४२ वर्षीया जरीवालाको बिहीबार राति मुम्बईको एक अस्पतालमा उपचारका क्रममा ज्यान गएको हो।
परिवारका अनुसार उनलाई राति छातीमा तीव्र पीडा भएपछि अस्पताल लैजाँदै गर्दा बाटोमै मृत्यु भएको बताइएको छ। बेलेव्यु मल्टिस्पेशालिटी अस्पताल, अंधेरी पु-याइएकी जरीवालालाई चिकित्सकले ‘डेड अन अराइभल’ घोषणा गरेका थिए। त्यसपछि शव पोस्टमार्टमका लागि कूपर अस्पताल पठाइएको छ।
शेफाली लामो समयदेखि मिर्गी (epilepsy) र मानसिक तनाव (depression) का समस्याबाट पनि ग्रसित रहेको भारतीय सञ्चारमाध्यमहरूले उल्लेख गरेका छन्। पछिल्लो समय उनी सामाजिक सञ्जालमा पनि केही रहस्यमय पोस्टहरू गर्दै आएकी थिइन्।
२००२ मा सार्वजनिक ‘कांटा लगा’ म्यूजिक भिडियोबाट चर्चा कमाएकी शेफाली त्यसपछि धेरै म्यूजिक भिडियो र टेलिभिजन रियलिटी शोमा देखा परेकी थिइन्। ‘नच बलिए ५’, ‘बिगबोस १३’ जस्ता कार्यक्रममार्फत उनले पुनः दर्शकको ध्यान तानेकी थिइन्।
उनको मृत्युको खबरले बलिउड र टेलिभिजन क्षेत्रलाई स्तब्ध बनाएको छ। गायक मिका सिंह, अभिनेत्री दिव्यांका त्रिपाठी लगायतका कलाकारहरूले सामाजिक सञ्जालमार्फत समवेदना प्रकट गरेका छन्। धेरैले “अझै विश्वास गर्न सकिरहेको छैनौं” भन्दै दुख व्यक्त गरेका छन्।
उनको पछिल्लो इन्स्टाग्राम पोस्टमा लेखिएको थियो – “Bling it on baby!”, जुन अहिले सामाजिक सञ्जालमा तीव्र रूपमा भाइरल भइरहेको छ।
शेफाली जरीवालाले अन्तिम अन्तर्वार्तामा भनेकी थिइन्, “म मृत्युसम्म ‘कांटा लगा गर्ल’ को रूपमा चिनिन चाहन्छु।” दुर्भाग्यवश, त्यो परिचय अहिले श्रद्धाञ्जलीको रूपमा रहन पुगेको छ।
उनको आत्माको चिर शान्तिको कामना गर्दै, समस्त भारतीय मनोरञ्जन जगत र फ्यानहरूले गहिरो श्रद्धाञ्जली अर्पण गरेका छन्।
